NATAL

L'è Natal anca incœu. Tutt i ann el riva

E sempr' all'istess dì...

Col sò làor, col sò incens, cont la soa piva...

Anca quest'ann l'è chì...

L'è Natal . . . l'è Natal ! . . . Sú, donca, allégher ! . . .

Cossa l'è sto muson?...

Quest l'è on dì de legrìa; i idej négher

Vann casciaa in d'on canton ! . . .

Oh, beatt i bagaj, che in sta giornada

No gh'hann alter cuntee

Ch'el Preseppi, el Bambin, la gran pacciada,

E la pianta, e i bellee !

Lor hinn i únich che pò godè sta festa

Senza vess tossegaa

Dal velen di penser che nass in testa

Cont el cress de l'etaa:

Quell velen che ghe ciammen « esperienza »,

Che, quand vun l'ha bevuu,

El pò dì (rivaa in fin dell'esistenza)

Per coss'è ch'hoo vivuu?...