I par usei
la gent in bicicleta.
Apena al pé
al toca ancor la tera
a turna in ment
col ch'i evum vrü smangà.
D'cul fiur trasparent
ciamà supiòn
a g'n'é di prà
Basta na luserta a travarsà
ch'i sa sfa.
Gh'ei sta ?
Alvé la man ch'in s'grata mai i coión.
Me am capit' in prömavera
s'a m'inochi a vardà
li palpogni ca sbat cuntra i lampion.
I porta ancora al tabar
da li me bandi.
A ghé an vèc dal Ricovar Buris-Lodigiani
c'al sgh'invoia dentr'in fin i oc
cme s'al vrés dir
an vöi pö vedr'ansön.
Frasi ca scultava da pütlet
iè dré a sucedar propria in sla me pèl.
Mitóm: cul piop lé
al g'sarà c'ang' sarò mia pö me.
S'le grand al Po.
Coi ca s'incuntra là
i sbasa sens'acorzasan la vus,
e i arcnós,
cm'an po' ad malincunia,
ca siom dabón cumpagn.
As pöl inamuraras dapartöt
m'andua tsé ná dapö.
L'é mia question ad cosi ad téti no,
la dona lusaresa quand la réd,
anc da luntan,
basta parché sübét a mé l'am s'drésa
cme pr'an flaut.
|