A vigilia ndì me soru
(di Corrado Floridia)
….E accussì arruvau macari la vigilia di Natali
a casa di me soru china di genti e attrittantu di riali,
aspittannu l’arrivu di cumpari e parenti
‘ngannammu a panza cu patatini ‘menzu e renti,
e finammenti dopu saluti e sfoggiu di liganza
n’assittammu tutti dopu e reci e menza.
Fu bona e prilibata la pietanza
gratificannu la pattruna casalinga di valenza
ca puttava mangiari ‘nsighitanza,
mangiannu scacciati chini macari cu li cavuli
e piscispata,baccalà e puppetti di muccu supra li tavuli
pi finiri non c’era cettu u panettoni bauli
ca fu sostituitu d’eccellenza
cu n’autru ancora cauru di fragranza
e fu chiddu u motivu do ritaddu in bona sustanza.
A menzanotti niscemmu i peri di sutta o tavulinu
Picchì fora sparaunu bummi a cielu chinu
ca pareumu a sira o 4 o focu do futtinu,
e mentri li taliavu belli e fosforescenti
pinzavu, è Natali o capurannu? non ci staiu capennu nenti,
a lu voti pi Natali ittamu i cosi vecchi de cantarani
e a capurannu sunamu li campani?
Ma tunnammu intra a mangiari calia simenza e nuciddi americani.
…E accussì de beddi riali arruvau l’ura,
mentri me cugnatu a Mimmuzzu ci stuiava la surura,
accattati e pinzati cu tantu amuri
pi scangialli e sbrugghialli ni passanu occa 2 uri,
visti di tuttu fora di ‘ddi cattuni
c’ allinghenu tempu nenti tuttu lu saluni
di pupi,robbi e cosi di valori
di pignati,stroppi e cazzalori
di piatti ,tappiti e quattri
u restu vu l’assu pinzari a vuattri.
…E accussì ninniemmu tutti cuntenti
famigghia,cumpari e parenti
ma chiddu ca chiussai cunta di tutta sta ‘nzalata\
è ca passai’nsemi a me famigghia ‘na splendida sirata.
Corrado Floridia
"...primavera siciliana" olio su tela cm 120 x 50 |