Frequenter Allatae Quaestiones

• Quid est methodus natura?
  • Hans H. Ørberg vir doctissimus opus maximum, in quo novam methodum in Lingua Latina docenda praebet, mirabili doctrina exaravit. Liber inscribitur: Lingua Latina per se illustrata et ex quattuor voluminibus constat, in quibus dicipuli, in parte priore, de vita Romanorum multa iocose consequi possunt; in altera parte Quiritium historiae maximis momentis, insignibus auctorum scriptis delectis, erudiuntur. Discipulus qui hunc ordinem sequetur in legendo declinationes sibi ignotas inveniet et vocabula nova et structuras morphologicas et syntacticas quae illustrentur in marginibus paginarum aut per se intellegantur. Ad intima pedetemptim humanitatis studiorum secreta pueri feruntur et maxime ad monumenta litterarum non tantum classicarum sed etiam Medii Aevi et aetatis qua doctrinae studium atque humanitatis revocatum est.

• Quid interest inter methodum naturalem et methodum naturam?
  • Iuxta methodum naturalem linguam quamlibet doceo usum vivum sermonis praesertim adhibens, rationibus omissis quae ad systema symbolorum et signorum doctrinae metalinguisticae pertinent. Iuxta methodum naturam autem linguam quamlibet doceo non tantum usum vivum sermonis adhibens, sed etiam pueros instituens systemate structurae morphlogicae et syntacticae.

• Magister quidam a metohodo tralaticia ad methodum naturam progredi fortasse potest?
  • Nullo modo accidere potest, quod pueri, inceptis biennio studiis secundum methodum tralaticiam, se triennio dent, duce magistro, ad methodum Ørbergianam. Nihil inutilius, nihil imbecillius! Agitur enim de quaestione revolutionis cuiusdam, quae iure Copernicana dicta est, in qua res grammaticales non a priori illustrandae sunt, sicut apud grammaticas normativas, sed, ut philosophice loquar, a posteriori. Scilicet postquam regulam quandam discipulus invenerit in textis, in quibus legit ipse fabulam scriptione continua exaratam et in qua de rebus cotidianis agatur. Tria capita, qua mea prudentia est, maximi momenti putanda videntur. Primum, ex nobis ipsis quaerendum est quae pars morphologiae necnon syntaxeos et quot annis evolvenda sit (quaestio enim maxime attinet ad praelectiones, modo Parisiensi adhibito, adipiscendas: quid discipulis ante omnia sciendum sit). Deinde, quo modo nos, iuxta methodum naturam, facere possimus ut discipuli vocabula singillatim discant et Lexicon consulendum vitent. Postremo quae pensa idest qui auctores nobis eligendi sint in pensis scholasticis. In arte grammatica vero, maxime in methodo natura, res non tam bene se gerunt plurimas ob causas, sed fortasse id primum locum obtinet, quod accidit ut discipuli putent declinationes atque coniugationes atque cetera sibi diligentissime discendas non esse. Rebus sic stantibus, dico semper grammaticam Latinam discipulis meis discendam esse sicut "Ave Maria", idest, strictissimo sensu, memoria.