ARCHIVIO.... chiudi/close [ X ]
5 12 2001
L'intervista.
(abbiamo chiamato"intervista" un colloquio realmente avvenuto tra un zaratino esule (es-) ed un zaratino "rimasto" (st-) )
esule-Come xe?
stanziale-Semo veci, ciò. Vado per i otanta .
es-Scoltime, volevo saver cossa che se dise a Zara de sti ultimi fati. Insoma cosa i pensa?
st-Tute monade. In fondo se proprio i doveva dar sta medaja i doveva far una cosa unica.
es-Come una cosa unica?
st-Ma si i doveva far qualcosa con i esuli e con la zità de adeso. Una specie de pacificazion, insoma.
es-Va ben, no se ga fato, ma ve gavè incazà tropo, me par?
st-No che no se gavemo incazà tropo. Come quando che xe venù el Misoni, con la television, el riva e el vol eser ricevù dal sindaco, e el sindaco che no saveva niente che non lo ricevi, e 'l fa ben, cossa se fa cussì un incontro importante dopo zinquanta anni? E pò dopo el se incaza e el disi che mai più el metarà piede a Zara, e chi lo ciama, che el vadi...
es-Ma i veci cossa i pensa.
st -Cossa te vol che i pensi? Xe pasai zinquanta ani, a noi ne gavè sempre maledì. Gavè fato de tuto per farne cavar la pension italiana, ricordemo tute ste cose, cossa volè? Volè una pacificazion? Cambiè modo de far.
es-Alora qualcosa se podaria far?
st-Si, ma con altri sistemi. Senti ma xe vero che Cossiga se ga rincoionì?
es-Non me par, perchè, e pò lu el xe filocroato.
st-Ma come filocroato?
es-Forse te volevi dir Ciampi?
st-No so, forse, no go ben capì cossa che i parlava.
es-Ma xe vero che la zità ghe ga dà la citadinanza onoraria a quel general? Si quel che i vol procesar?
st-Si che xe vero.
es-E perchè, e come mai?
st-Perchè el ga combattù, el xe un Eroe, el xe come Garibaldi per voi.
es-Si va ben, ma se i lo ciapa i lo processa....
st-Intanto no credo che i lo ciaparà mai, e pò cossa xe quel tribunal? Me par un'altra de quele monade che i fa per cior stipendi e bori. E pò se i lo processa a lui, i dovaria processar mezzo mondo. Mai no i lo ciaparà. E comunque per noi el xe un eroe.
es-Ma xe el stesso tribunal che processa el Milosevic.
st-Si ma al general no i lo ciaparà mai.
es-Ma per la medaja, cossa pensè?
st-Che saria giusto che sia anche una rapresentanza de i nostri. In fondo anche noi che jerimo soto i bombardamenti, gavemo servì l'Italia, e pò se gavemo anca la pension?
es-Ma questa xe una tua idea? O xe voce de popolo?
st-Ma xe l'una e l'altra. In fondo adeso Zara gavarà ottanta o zentomila abitanti, tuta gente mai vista, noi se sentimo più vizini a voi che a sti novi. Se voi che no ve senti vizini a noi.
es-Ma ti te son iscritto all'asociazion?
st-No mi, sarà un dozento de lori che se ga segnà. Mi no me trovo, e tanti altri come mi.
es-Va ben. Ne sentimo per i auguri de Nadal. Parlaremo ancora. E pò a febraio a Trieste?
st-Va ben, ciao adio.
es-Ciao, adio, stame ben.
Copyright Editoriale Adiacus Possidebit