Alcune poesie di Martin Piaggio:
A torta pasqualinn-a
1820 (l'anno della cometa)

RICETTA PE FA I RAVIEU

    Recipe ûn bello pesso de vitella
    Da mette a rosto per fà ûn bon tocchetto;
    Recipe da tettinn-a, ûnn-a cervella,
    Laccetti, poca möula, e assæ do fietto;
    Recipe da buraxa fresca, e bella,
    Cuccoin de pulla freschi, ûn rettaggetto
    De sàsissa da amixi, e ûn pò de quella
    Prescinsêua de Paiscion passà a-o siassetto;
    Misce et Remisce ben ciù che ti péu
    Omnia confusim drento in to mortà,
    Et extende de pasta ûn gran lensêu;
    Fanne de ballettinn-e cö cûggià,
    Applica, crêuvi, taggia, son Raviêu
    Da chêuxe, et tamquam pilloe da collà.

 

 

 

 

 

 

A TORTA PASQUALINN-A

Sonetto

    Beneita mille votte, e beneixìa
    E benedetta quella magnettinn-a,
    Chi sa fà unn-a Tortetta pasqualinn-a,
    E ve a presenta càda, e brustolìa;
    Beneito sae quell’èuggio chi l’ammìa,
    E quell’odò ch’a manda da vixinn-a,
    L’erbetta, o cuccon fresco de pollinn-a
    E quella prescinsèua chi scappa via;
    Beneita seggie a meìzoa cò cannello,
    O siàso, e a faenn-a chi se lascia stà,
    E l’èujo chi ven zù comme un piscioello;
    Beneito seggie o forno cò fornà;
    O testo, otondo, a ciùmma cò cottello,
    E quella bocca chi ne pèu mangià.

 

A ricetta pe fa i ravieu
1820

 

----------------------------------------------

 

1820

    L’anno vegio ( grazie a Dio )
    Dixinêuve o l’e finïo;
    O l’è stæto assæ abbondante,
    Ma ûn pö scarso de contante;
    Uga e gran in quantitæ,
    Ma i negozii troppo affiæ;
    Spedizioïn, e arrivi in grande,
    Ma rottûe da tûtte e bande,
    Che in te l’êujo, a sæa, e o gran
    S’han toccôu di belli o pan,
    E in ti cangi a bon mercôu
    Qualchedûn se gh’è strinnôu.
    Gh’emmo avûo quelle demoette
    Da frûstâ braghe e fädette
    Che n’han fæto tanto andâ
    Da no poeìse ciù fermâ,
    E n’han misso a mâ partïo,
    Ricco e poveo gh’è corrïo;
    A Cometa co-a spassuïa
    Che a no voeiva andà ciù via....
    Ma do resto semmo stæti
    Ben contenti e soddisfæti,
    Perchè Pan Grosso e Vin Bon
    N’han mai fæto indigestion.
    Imprincipia l’Anno nêuvo,
    Che da quello che mi trêuvo
    Scrito in t’ûnn-a carta gottica
    Osservâ ne-a Camera ottica,
    O dev’ëse bon assæ,
    E abbondante de Dinæ.
    Ha da nasce tanto gran
    Con tant’êujo e tanto vin,
    Che (salvando o freiddo e o coin)
    Dove mettii no saviän:
    Abbondanza de legûmmi,
    De polenta, frûta e agrûmmi,
    Funzi abbrettio, fen, castagne
    Finn-a di erboi de lasagne.
    (Ma se a caxo o freiddo e o coin
    Fessan perde o gran e o vin ?
    Figgi cäi, no ghe pensemmo
    Stemmo allegri perchè gh’emmo
    Di Ommi bravi, che saviän
    Convertî a lentiggia in gran,
    E c’ûn pö de soffranin,
    Sangue e colla, fâ do vin.)
    O commercio o vegniä vivo
    E o cessiä d’ëse pascivo;
    I mercanti intraprendiän,
    Nè con perde ciù vendiän;
    I sensæ devan vegnî
    Comme lascie da-o corrî;
    Vendiän tanto i bûtteghæ
    Che restiän desbarassæ;
    I artisti travaggiän,
    E i camalli camalliän;
    Solo i meghi han da restâ
    Sempre all’ozio senza mâ;
    Se godiä ûnn-a Sanitæ
    Che serriän finn-a i ûspiæ;
    I dottoî porriän andâ
    In campagna a villezzâ,
    Perchè in paxe e amô viviemo,
    E nisciun ciù litighiemo;
    Tùtte e figgie se majän,
    Finn-a i vegi se bolliän....
    Scialla ! dunque che se fasse
    Di Ravieû, Torta, e Cazasse
    Per stâ megio in allegria
    Tûtto l’anno, e così scia.

 

A ricetta pe fa i ravieu
A torta pasqualinn-a
----------------------------------- La Biografia