Si fici ranni, maturu e fa frutti belli
comu a ‘n peri di ficu,
pi’ ccu non l’avissi caputu, staiu parrannu
di Filippu, cunfirmatu ‘n veru amicu.
Comu ogni fruttu avi u so’ sapuri
e ogni lignu avi u so’ fumu,
nuattri ni canuscemu e n’accittamu pi’ chiddi ca semu.
Quannu ti vogghiu virriri, ti ricu ca mi sentu troppu mali
e ci varagnu sulu quattru boni paroli,
ma d’accussi’ m’ascuti, ti fazzu scantari
e mi sentu riri:” appena poi, venimi a truvari.”
Staiu sghizzannu, u sacciu ca si troppu ‘mpignatu
e o mumentu giustu nun t’abbii mai di latu.
Di cangiariti, pero’, ci aiu pinsatu pi’ ionna e sittimani,
ma a fini mi cunvinciu ca a tiniriti mi cummeni.
Ora, prima ca speddi st’ispirazioni e pi’ finiri,
du cosi seri, prima ca mi scoddu, ti vogghiu riri:
nun ti prei quannu a luci ‘ngoddu di tia veni di fora,
ma a cchiu’ bella luci e’ chidda ca ti veni di intra sora sora;
picchi’ a prima picca cunta e t’allucia sulu a tia,
a secunna fa luci a cu’ ti sta attonnu
e u sai megghiu di mia.
Peccio’, macari ‘nda sti tempi,
ca nun semu ‘ngucchiati di viddicu,
sti paroli nun su’ assai pi’ discriviri n’amicu,
ma su voli Diu,
ci ni sarannu tanti autri, e chiddi appoi ti ricu.